التون و الأندرتون، شنو معناهن وليش مهم اني نعرفهن!؟ The Tone & Undertone !!??? What it is and why it is important to know them!!

التون عزيزاتي هو لون جلدك الخارجي !! و طبعاً هو شي متغير ، يتغير علي حسب الفصول و علي حسب البيئة و علي حسب لو 

انتي من محبي التان و البرونزاج ولا لا ...

التون انواع و ممكن تحديده من النظر للجلد بدون اي تفاسير ولا خرابييييط ولا قواميس 😋 

و مهم جداً تكوني عارفه شنو هو التون امتاعك عشان تقدري تختاري درجات الفاونديشن و الكونسيلر البيرفكت لك و لإطلالتك .. 

طبعاً في الحاله هذه انا ننصحك بالتجريب و التجريب و التجريب !!! 

اذا كنتي بيضاء ولا حنطية ولا سمراء بالانجليزي 

Fair, Medium,Dark 

لازم تختاري درجة الفاونديشن و الكونسيلر المناسبة لبشرتك لا افتح ولا أغمق .. الفاتح اكثر من اللازم يبينك مغبرة و الأغمق مش حيكون حلو ابداً عليك ..

يا بنات لازم نتفقوا من توا اننا لازم نحبو لون بشرتنا و الغرض من الميكب مش انك تبيضي روحك و تقعدي زي الشبح .. 

الغرض من الميكب العصري انه يعطي نظارة و إضاءة و شكل صحي .. تمااااااام 👌🏼😘

توا نجو للموضوع اللي أغلبكن يحس فيه معقد و هو موضوع الاندرتون Undertone : 

الاندرتون هو لون [السحنة] او [المسحة]او [الظل]  و هو عمره ما يتغير بتأثير الشمس او الاضاءه او البرونزاج هو ديما ثابت و هو تحت لون الجلد ..

عمرك مثلاً ما سألتي نفسك ليش لون معين لما تلبسيه تحسي لونك شاحب و تعبان ، ولا لون روج معين لم تحطيه ما يكونش عليك حلو مع ان ممكن حد ثاني يحطه و يبان عليه حلو !!!

ولا اخترتي فاونديشن لدرجة بشرتك بس لما تستخدميه تحسي فيه مش مزبوط عليك ، او تحسّيه يبان عليك كانك مرهقه لما تحطيه و هكذاااا 

يعني مواقف واجده زي هذين يصيرن و اكيييييد صارن معاك ..

وممكن مر عليك الموضوع بدون إجابات !!

الإجابة تكمن في كلمة الاندرتون ..

و هو ثلاث درجات بس و مش ممكن يكونن اكثر من هكي .. 

1/ Warm Undertone (دافئ)

2/ Cool Undertone (بارد) 

3/ Neutral Undertone (محايد) 

                    الأندرتون الدافئ

يعني أن لون الجلد يحتوي بشكل رئيسي على صبغة صفراء / ذهبية / زيتونية.

                      الأندرتون البارد 

 يعني أن الجلد يحتوي بشكل رئيسي على صبغة زهرية / بنفسجية / زرقاء .

                   الأندرتون المحايد 

يعني إنه الجلد يحتوي على صبغات باردة و دافئة في نفس الوقت.

 و فيه ناس تصنف أصحاب البشرة الزيتونية بإنهم أصحاب أندرتون محايد لأنه خليط من الأزرق و الأصفر، لكن الأغلب يصنفوه دافيء لأنه في أغلب الحالات يكون اللون الأصفر طاغي علي صبغة الجلد .

     كيف ممكن نحدد الاندرتون امتاعي !؟؟؟

عندك مجموعة متنوعة من الاختبارات حنحطلك أشهرها و أسهلها  😉😘 I got you covered 

الاختبار الاول : اختبار الاوردة || veins test 

الاختبار هذا هو  الأسهل و الأوضح و الأدق بالنسبة لي ، في الأول لازم تكوني في مكان إضائته كويسة و شوفي لون الأوردة عندك كيف ؟!

إذا كان لونها أزرق أو بنفسجي إذا بشرتك باردة 

                                                          إذا كان لونها أخضر و أزرق مع بعض فبشرتك طبيعية \ معتدلة   

                                                          إذا كان لونها أخضر فانتي بشرتك دافية 

 الاختبار الثاني : اختبار المجوهرات || jewelry    test 

الاختبار هذا ممتع ،  في لأول لازم تكوني في مكان الاضاءة فيه جيدة  و قدامك مراية جيبي قطعتين قماش او اكسسوار 

وحدة فضي و الثانية ذهبي ، و قربيهم من وجهك و شوفي أيهم يبهت بشرتك و أيهم يعطيك نضارة ، 

اذا ناسبك الذهبي معناها بشرتك دافيه ، و إذا ناسبك الفضي معناها  بشرتك باردة و لو ناسبوك الاثنين يعني بشرتك معتدلة :)

حنحطلكن هنا ڤيديو للميكب ارتست الكويتية حنان النجاده .. و ابدعت هي في شرح الموضوع 

الڤيديو صح طويل شويا بس مفييييييد و نتمني أنكن تشوفنه عشان تفهمن الموضوع ومعش تلقن ارواحكن حايسات فيه 😍😊

http://youtu.be/N7kZqPfqT48

توا حنحكي علي اخر نقطة و هي اهممممم حاجة في موضوع الاندرتون ، لان قصص الملابس و الوانهن بسيطه و ممكن تنحل ، و تقدري تجربي و تغيري و تلبسي جميع الألوان عشان في النهايه تعرفي شن اللون اللي يمشي معاك و شنو لا ..

بس الحاجة اللي مش ممكن الغلط فيها في الفاونديشن و الكونسيلر ، يعني لازم تقعدي عارفه بالضبط شنو اللي لك و شنو اللي مستحيل حيطلع عليك حلو مهما قربتي الدرجة لبشرتك 

جميع ماركات المكياج من الهاي إيند

 high end للدرق ستور Drugstore  معش قعدن ينزلن في فاونديشن وخلاص 

، قعد فيه درجات علي حسب الاندرتون 

بالنسبه لماك فييييه حاجة مهمه جدااااً جداً بس مش حنقولها توا ، بعد ما تقرن الموضوع حنقوللكن عليها بس انتن ذكرني بيها !! ليش؟ 

لانها تلخبط و ما نبيش نلخبطكن ، نبيكن تفهمن الموضوع و بعدها نتفرعو فيه 😆😋

                                      إختيار كريم الأساس

إذا كان الأندرتون امتاعك  دافيء، غالبا الفاونديشن اللي يناسبك حيكون اسمه يحتوي على مصطلحات زي

: (على سبيل المثال لا الحصر)

Yellow

Golden 

Gold 

Caramel 

Peach 

Bronze

Warm

Tan

 Marble

Sand

Desert

:(و إذا كان بارد دوري على مصطلحات زي (برضو على سبيل المثال لا الحصر

Pink

 Cool

 mahogany

 Porcelain

Vanilla

Ebony 

أما إذا كانت محايدة

Neutral

 Beige

 chestnut

 Almond

 flesh

هذه تقريباً اغلب التسميات الدارجة لدرجات الفاونديشن في اغلب الماركات 

، استثنيت

 MAC عشان حنقوللكن عليه بروحه ..

النصيحة اللي ديما ننصحها لأي وحدة قبل ما تشري فاونديشن إنك تاخذي وقتك لما تجي تشري، قارني أكثر من لون و درجة في إضاءة كويسة، اطلبي تيستر من المحل و ممكن تاخذي علبة صغيرة يحطوا لك فيها تيستر عشان تقارني و تجربي براحتك في البيت، خصوصا إذا كانت ماركة أو نوع فاونديشن أول مرة تجربيه.

ان شاااااءالله يكون الموضوع وصل و فهمتو عليااااا  😅😅

تحياتي ..

تجرُبتي مع كلاريسونيك آريا CLARISONIC SONIC RADIANCE BRIGHTENING SOLUTION KIT REVIEW

CLARISONIC SONIC RADIANCE BRIGHTENING

 SOLUTION KIT 

ملاحظة : هذا النظام يناسب جميع انواع البشرة فهو متوازن تماما" للبشرة الدهنية و الجافه و الحساسة

مجموعة التفتيح من كلاريسونيك 

المجموعه هذه تجي في علبة واحدة تحتوي علي 

1/جهاز آريا مع رأس فرشاة واحد (Radiance Brush Head)

2/شاحن USB

 مع ستاند للإستخدام اثناء الشحن او لتجفيف الجهاز بعد الاستخدام 

3/غسول صباحي AM

تركيبته حليبيه و يدير رغوة خفيفه لجميع انواع البشرة مكتوب انه يفتح و يوحد لون البشرة

 (skin illuminating cleanser)

4/غسول مسائي PM 

تركيبته شفافة 

و يقوم بتقشير خفيف للبشرة  .. الغسول هذا 

يحتوي علي

LHA , Salicylic & Glycolic acids

5/ السيروم

 (Brightening Activating Serum)

 يساعد في تخفيف التصبغات اللي تعاني منها البشرة و يمنع ظهور تصبغات جديدة 

رأي الخاص : 

طبعاً انا قبل ما نشري الجهاز قريت ريڤيوز لأشخاص استخدمو الجهاز هذا و اجهزة كلاريسونيك بصفه عامة ، و شفت ڤيديوز يوتيوب لبيوتي بلوقرز بالتفصيييييل الممل عن هالموضوع

وكنت مترددة للغاية 

و خصوصاً ان الجهاز شويا غالي

 little pit pricy 😁

احسن ريڤيو شفته هو هذا 

https://youtu.be/PIz_lmBRqyg

هو طويل شويا بس مهمممم بكل و فيه مقارنة مع الأجيال السابقة من شركة كلاريسونيك 😍😍

المهم شنو رأي انا 

طبعاً لو انتي زي حالاتي وهذه اول مرة تبي تشري الجهاز و تبي حاجة صح و نظام جميل و نتائج مبهرة طبعاً انا ننصحك بدون تردد اشري جهاز آريا 

انا بشرتي جافه و ما عنديش مشاكل واجد لاني متابعة بشرتي و واخذه علاجات و دايرة جلسات تقشير بس مره مرة تطلع حبه هكي ولا هكي و تخلي اثر و بصراحة شفت نتائج كويسه جداً بعد اسبوعين من الاستخدام المستمر 

حتي كنت نستخدم في نظام عناية صباحي و مسائي اخر و وقفته و قعدت مركزة مع الكلاريسونيك وبس .. و بعد خمس أسابيع نقدر نقول انها وفت بكل الوعود اللي قطعتهن 

بشرة نظيفه و موحدة اللون و اشراقة صحيه ..

(ملاحظة  ( التبييض مش واحد من الوعود 

نجو للجزء الثاني من الكلام : 

و هو موجه للي عندها جهاز

 Mia 

 ما تشريش جهاز جديد خوذي بس الفرشاة و نظام العناية و حتاخذي نفس النتيجة ان شاءالله ..

الشي اللي نبيكن تحطنه في بالكن ان النظام هذا يمشي مع جميع انواع البشرات و مش حيسبب مشاكل و لا جفاف ولا تحسس

في نقطة مهمه و هي انه في اول اسبوع ممكن تطلع حبوب صغيرة في الوجه

، رد باااااالك تخافي و توقفي 😱😱، استمري و حيمشو بروحهم

ملاحظه : بالنسبة للسعر من موقع الشركه هو 199$ /دولار .. طبعا" مع سعر الدولار توا للأسف حتكون واصله لعندك بسعر الشحن بسعر يترواح بين ال 400 و ال 500 دينار ليبي 

لو عندكن آي استفسار اخر تعالو للانستاقرام و لا سيبيلي سؤالك تحت في التعليقات و حنرد عليك 😘😊

Skin Types.. Skin Care (step 1)

التعرف على الفئة التي تنتمي إليها بشرتك يساعدك في تحديد روتين العناية بالبشرة الذي يجدر بك اتباعه لضمان نضارة بشرتك
واشراقها، يعزى نوع بشرتك إلى العوامل الوراثية ومستويات الهرمون واسلوب العيش...

البشرة الطبيعية (العادية)

مميزاتها

البشرة العادية، بالنسبة للمحظوظين كفاية لامتلاكها تبدو ناعمة وجامدة الملمس في الوقت نفسه، 

ليس هناك مساحات دهنية أو جافة، أو بقع أو بثور أو مشاكل، إنها شائعة لدى الأولاد ولكنها قليلة لدى الراشدين

كيفية العناية بها:

نظفيها جيداً باستعمال منظف ملائم، مرة على الأقل في اليوم

اختاري مرطباً خفيفاً

ضعي عليه كريماً واقياً من الشمس عند الخروج من البيت لحمايتها من ضرر الشمس

البشرة الدهنية (الزيتية)

مميزاتها

يمكن أن تظهر البشرة الدهنية بعد النضوج الجنسي، حيث تؤدي التغيرات في مستوى الهرمونات إلى زيادة مقدار مادة الزهم المنتجة مما يجعل البشرة زيتية، مع مسام ظاهرة ومظهر براق وميل إلى البثور أو حب الشباب، لكن ميزة البشرة الذهنية تتجلى في تأخر ظهور التجاعيد الي  سن متأخرة ولذلك تبدين أكثرشبابا" لمدة أطول

كيفية العناية بها:

استخدمي منظفاً خاصاً بالبشرة الدهنية

لا تفرطي في تنظيف البشرة في محاولة للتخلص من الزهم، فهذا يحفز ببساطة الغدد الدهنية.

استخدمي ملطفاً للبشرة أو مادة قابضة بعد التنظيف لتحسين ظهور المسام الكبيرة.

ضعي طبقة رقيقة من المرطب الخاص بالبشرة الدهنية.

حاولي معالجة مشاكل البشرة فور ظهورها، بما في ذلك فورة البقع أو اللطخات، فهذا يحول دون تفاقم المشكلة.

ضعي مستحضراً غير زيتي (ممكن انه يكون كريم لكن يكون خفيف و سريع الامتصاص و ما يدهنش و اهمممم شي يكون خاص للبشرةالدهنيه )واقياً من الشمس عند الخروج من المنزل

البشرة المركبة (المختلطة)

مميزاتها

إنها ربما النوع الأكثر شيوعاً خصوصاً بين المتقدمين في العمر

يكون القسم الأوسط من الوجه أي الجبين والأنف والذقن او ما يعرف بال

(T zone )دهنياً وأكثر خشونة من بقية انحاء الوجه. ويكون الخدان عاديين أو جافين. والبشرة المركبة عرضة للطخات من حين إلى آخر.

:كيفية العناية بها

نظفي وجهك بمنتج خالٍ من الصابون لمنع الأماكن الجافة من التجفاف أكثر ولتفادي تحفيز الغدد الدهنية

ضعي طبقة من الكريم على الأماكن الجافة. واستخدمي منتجاً خفيفاً عن الضرورة في الأماكن الزيتية

جربي المواد القابضة أو المنعشة في الأماكن الزيتية لتحسين تركيبة الجلد.

ضعي واقي شمس خفيف عالبشرة مع مراعاة ان لا يكون زيتيا"

-العناية لهذا النوع من البشرات يكون خليطا" بين البشرة الجافة و الدهنيه

(البشرة الحساسه)

هي لا تعتبر نوع منفصل عن الانواع الاخري من البشرات ،

فجميع انواع البشرة معرضه لأن تمر بمرحلة البشرة الحساسة عند تعرضها لعوامل معينة مثلا" : كإستخدام مستحضرات عناية للجلد والتي قد تسبب تهيجا"

اهم العلامات التي يمكن ملاحظتها في البشرة الحساسه او في حال تحسس البشرة  هي الإحمرار و الحكة و الجفاف ..

.. لو عندكم اي سؤال اكتبوه تحت او تعالو للإنستقرام عشان تسألوني ان شاءالله تكونن استفدتن 

تحياتي .. 

Welcome to my Blog

جمال المرأة الليبية بالزي التقليدي

Hey Ladies :

Am so excited to introduce my self to you , a Libyan beauty and fashion blogger with real blog 😍

It took me a while before deciding and finding enough courage to start this blog, cuz starting the something is one thing and keeping it interesting and a live is a total different thing ..

So here i am , doing my best to introduce us the Libyan women to the world and with your help and support we will do it together

مرحبا" عزيزاتي :

انا متشوقه جدا لأقدم نفسي كأول مدونة ليبيه عن الجمال و المكياج و الموضه و بمدونه حقيقيه

اخذ مني الموضوع بعض الوقت قبل ان اقرر ان اقدم علي هذه الخطوةو قبل ان استجمع شجاعتي ،لان الابتداء في امر ما هو شئ سهل ولكن الاستمرار فيه بنفس الزخم و أعطاءه كامل الوقت و الطاقه هو امر مختلف تماما ..هانا هنا لأقدمنا نحن النساء الليبيات للعالم .. و بمساعدتكن و دعمكن سنتمكن من فعل ذلك و النجاح فيه