Baby steps to makeup application
طريقة وضع المكياج بالخطوة part (1)
بشرة جميلة = مكياج جميل
الخطوة الاولي و الأساسيه قبل وضع المكياج علي الوجه هي تحضير البشرة .. ما معني تحضير البشرة ؟
اي إعدادها الإعداد الصحيح لوضع كريم النهار او كريم الأساس الخاص بك عليها و كلامي هنا بالذات لصاحبات البشرات الجافه لانه اكثر وحدات معرضات لظهور القشور و الخطوط علي الوجه بعد وضع الفاونديشن
1/ تقشير الوجه
التقشير هو خطوة لا غني عنها و تعتبر احدي اهم الخطوات في نظام العناية بالبشرة
تقشير البشرة ممكن انك تديريه من مرة الي ثلاث مرات في الأسبوع علي حسب نوع بشرتك و علي حسب استخدامك للمكياج ..
هل فيه انواع للمقشرات ؟
طبعاً اكيد ، و لكل نوع بشرة مقشر خاص بيها
مثلاً اللي بشرتها جافه ممكن ما يمشيش معاها مقشر حبوب التقشير فيه غليظه و كبيرة لانه حيجففلها بشرتها بزيادة
و صاحبات البشرة الدهنيه مش حيمشي معاهن مقشر سطحي وًخفيف لأنهن محتاجات مقشرات عميقة المفعول و تنظف المسام
صاحبات البشرة الحساسه و اللي ممكن يسيرلهن إحمرار لازم يكون المقشر امتاعهن لطيف و ما يسببش تهيج
هذه تعتبر خطوط عريضة لأنواع المقشرات
و ممكن كل واحدة فيكن تكتبلنا شنو نوع بشرتها و احسن مقشر مشي معاها ..
بعد التقشير لازم لازم لازم من ترطيب البشرة مهما كان نوع بشرتك
ضروري تحطي عليها كميه لا بأس بيها من المرطب و تخلي الجلد يتشربها مزبوط ..
( و كل بشرة (زي ما حكيتلكن في موضوع انواع البشرات هنا
عندها نوع مرطب خاص بيها
اللي يمشي للبشرة الدهنيه ما يمشيش للجافه و لا المختلطه
لازم تكوني عارفه نوع بشرتك و تختاري المقشر و المرطب علي هذا الأساس
2/ تقشير الشفاه
اهم جزء في مكياج الوجه هو أحمر الشفاه ، لو كانن شفايفك متشققات وًجافات صدقيني حيطلع الروج جدااااً بشع و مشقق و خصوصاً لو كان نوعيته مطفي .
لذلك عزيزتي مش حتخسري شي لما تقشري شفايفك .. و انا نصيحتي انك في البدايه تقشريهن كل يوم و ترطبيهن
سواء بالڤازلين او مرطب الشفاه اللي تفضليه
هذا الجزء الاول تم .. يتبع
اللي عندها سؤال تقدر تخليه ليا هنا في التعليقات ولا الفيس او الانستاقرام ..
