Real Technique Face Brushes set.. طقم فرش الوجه من ريل تيكنيك

طقم فرش ريل تيكنيك للوجه ..

حاجة من ضمن الحاجات

الأساسيه اللي من وجهة نظري ضروري تكون عندك لو قررتي تطبقي الميكب علي نفسك التطبيق الصحيح.. النوعية و الجودة 

ممتااااازة و السعر يعتبر جيد و مقدور عليه .. البراند هذه ملك لأختين انجليزيات سام و نيك تشابمان .

يا بنات عشان مكياجك يكون جميل لازم الفرش تكون جودتهن كويسه عشان ما يبانش الفاونديشن و الكونسيلر مخططات و منظرهن بشع ..

اللي يميز فرش ريل تيكنيك انهن مصنوعات من شعر صناعي و مقصوصات يدويا" و انا نفضلهن عن اللي يكونن مصنوعات من شعر طبيعي لانهن حتي في التنظيف ياخذن وقت اقل ..

حنبدا بطاقم فرش الوجه و نحكيلكن عن طريقة استخدامي لكل واحده .

الطاقم (Face Brush Set) هذا يتكون من اربع فرش :

1/  Buffing Brush

(اللي هي فرشاة البفنق او توزيع الفاونديشن (السائل ولا الباودر المضغوط

انا ما نستخدمش فيها بس للفاونديشن ، نستخدم فيها للبلشر الكريمي و لدمج الكونتور 

حجمها حلو مش كبيره واجد  و مش صغيره

بصراحه احد احسن الفرش و اقربها لقلبي و كنت ما نستغنيش عنها .. بس بعد شريت البيوتي بلندر قعدت نستخدم فيها بعد ما نكمل بيها توزيع الفاونديشن

يعني اللمسه النهائية للبلندر اكييييد  و حكيت عليها من قبل في المدونه ..

2/Contour Brush

من اسمها واضح انها للكونتور .. سواء كان كريمي او باودر

ممتازة جدا" لدمج الكريم و توزيع كونتور الباودر

و دقيقة و راسها شوية مدبب و هذا احد اسباب الدقه امتاعها

انا نستخدم فيها في اكثر من حاجة ☺

اهم شي نوزع بيها فالإضاءة فوق عظمة الخد

و نثبت بيها في الكونسيلر تحت العين باللوس باودر كخطوة اخيرة

و مرااات  نحط بيها في البلشر لما نبيه بس علي تفاحات الخد 

3/Pointed Foundation Brush

هو من اسمها علي اساس انها للفاونديشن بس ما عمري وزعت بيها فاونديشن ..ولا حطيته بيها

بصراحه لان راسها يابس و الشعرات فيها محكمات نحب نستخدمها لوضع الكونسيلر الكريمي  تحت عيني و بذات امتاع ماك لانه يبي فرشة شعراتها ثابتات

و نفس الشي للكونتور الكريمي في جهة الخد و الحنك.

4/ Detailer Brush

(من اسمها للتفاصيل الدقيقة و الاماكن الضيقه اللي تبي تحطي عليهن كونسيلر او كوريكتر (مصحح)

و برضووووو انا نستخدم فيها مش للوجه ابدا ههههه

عندي لها استخدامين علي حسب الجو

مرات نستخدم فيها للدمج امتاع الايشادو تحت عيني

و مرات لما نبي ندكن زاوية العين بايشادو اسود و نبي كميه بسيطة

و اخر شي نستخدم فيها لتحديد الشفاه و توزيع احمر الشفاه و تشتغل بكفاءة عااااليه 

هل ننصحكن بيهن!؟؟

طبعا" طبعا" طبعا"  .. من الاشياء الجميله و اللي نشجعكن عليهن اليوم و بكره و بعدووووو

تحياتي ..