All About Eye Brow Mascara .. كل ما تحتاجي معرفته عن ماسكرا الحواجب

!!لما نقولو ماسكرا كلنا نفكرو في ماسكرا الرموش..

 بس من فترة مش بعيدة بدينا نسمعو في مصطلح ماسكرا الحواجب .. و اكيد من باب الفضول و التجربة و حب الميكب 

لازم نجربو .. و لما جربنا قعدنا نتسألو كيف كنا عايشين من غير هالمنتج هههههه :) مش ادمان لا سمح الله 

 :D  :P

 الثلاثة الحلوين اللي في الصورة هما من مفضلاتي بالنسبة للحواجب .. لحد توا مازال ما شفتش منتج 

في كفاءتهم و ابداعهم 

و هما :

1) MAC Brow Set in BEGUILE

2) MAC   Pro Longwear Waterproof Brow Set  in  QUIET BRUNETTE

3) Benefit Gimme Brow 

نردو توا لموضوعنا .. شنوهي ماسكرا الحواجب و شنو وظيفتها ؟؟

ماسكرا الحواجب هي عبارة عن جل .. في البداية كان الجل هذا شفاف و كان يستخدم عشان يمشط شعر الحواجب في اتجاهاته الطبيعيه قبل  ما تبدي تستخدمي الباودر او الجل(البوماد) عشان تعبي فراغات الشعر الموجودة في حواجبك

غير ترتيب الحواجب هو يثبت الشعرات في مكانهم وخصوصا" لوكان شعر حاجبك كثيف و ينزل علي تحت ..

بس هما ما وقفوش علي الجل الشفاف .. بدو ينزلوفي انواع للناس اللي تحب تفتح او تغمق في لون الحواجب يعني طلع نوع يعرف ب (Tinted Brow gel) 

يعني الجل اللي فيه لون (( تنت)) .. و منها فتح الباب علي مصرعيه في المجال هذا و اصبحنا نشوفو في كل البراندات ينزلو في ..

..ماسكرا حواجب بألوان و درجات متعدده 

 و مش هكي و بسسسس ههههه اصبحو ايضا" يبتكرو  و يدعمو في تركيبة الماسكرا الخاصة بالحواجب بفايبرز .. بحيث انه لو شعر حواجبك خفيف حتلاحظي بعد الاستخدام انه حاجبك تعبي و في رأي احسن براند من الناحية هذه هي بنفت و ماسكرا قمي براو 

خياااااال  المنتج هذا من جميع النواحي ..

 ..التعليب .. المادة .. الابليكيتور كل شي بيرفكت بجد .. 

 بالنسبة لأنستازيا .. الجل الشفاف عندها ممتاز  بالنسبة للماسكرا الملونة للحواجب امممم يعني فيه ماركات احسن منها في الشي هذا ..

ماك ... بالنسبة ليا هما الماسترز في موضوع ماسكرا الحواجب بجميع انواعها 

كواليتي ..تعليب.. عندهم نوعين واحد يشدك لثان ساعات او اكثر و الاخر اقل 

علي حسب طلعتك و المناخ اللي انتي فيه ..

طريقتي .. نمشط بالماسكرا الشفافة قبل ما نعبي فراغات و بالباودر او الجل و بعدها نستخدم ماسكرا ملونة علي حسب الميكب و المود .. لو نبي فاتح او غامق و هكذا .. لقيت الطريقة هذه تعطي حجم و ثبات 

و مرات من غير تعبئة لان حواجبي الحمدلله ما فيهمش مشاكل.. و بالذات طلعات الصبح نستحدم الماسكرا عالسريع نرتب بيها حواجبي و انتهي الموضوع ... 

المرة الجاية ممكن نحكو اكثر عن كل براند و اللي يميزها ..

ان شاءالله عجبكم الريفيو ..

تحياااااتي ..

(purity made simple (one-step facial cleanse ... غسول الوجه ذو الخطوة الواحدة من فيلوسفي

اليوم الريفيو .. خفيف ظريف ومفيد جدا" ان شاءالله

و حنكلمكم فيه عن منتج ليا فترة نستخدم فيه و لا مرة حكيت عنه !! مش عارفه ليش ؟؟

 المهممممم

المنتج هو من شركة

Philosophy 

!!و هو عبارة عن كلينزر ( غسول ) ينظف الميكب و يشيل البقايا و يشتغل عالمسام في خطوة واحدة 

 يعني يختصر خطوتين او ثلاثة من خطوات العناية بالبشرة 

اللي هما : مسح الميكب و ثم غسل الوجه و ثم  التونر 

 انا طريقتي كالأتي :نبلل في وجهي بقطعة قطن عني طريق المسح و نحط المنتج علي حسب مرات علي نفس القطنة مرات علي ايدي و نبدا ندير في حركات دائرية زي المساج علي كامل وجهي وحتي عيوني 

بصراحة ممتاااااز و مريح جدا" و رائحته زكيه و ينظف بامتياز .. ما يديرش تحسس ولا حرقان للعيون 

و يدير زي الرغوة 

انا بصراحة بعد مرحلة المسح نستحدم في الكلاريسونيك معاه و رغوته وفيرة 

لما نغسل وجهي نحس فعلا ان بشرتي نظيفة  و مش جافة ..

بس بعد اي تنظيف للبشرة انا نحب نرطب بشرتي كويس جدا" و حنحكيلكم علي ماسك الترطيب اللي نستخدم فيه حاليا" .. عجييييب جدا" .. 

نسيت نقوللكم انه هو يتم انتاجه من عام 2007 و انه واخذ جوائز كأفضل منتج لعدة اعوام و مازال مفضل عند الكثيرين 

لأنه عملي و يختصر الوقت 

للأسف العبوة هذه اصغر حجم لأني الحجم الكبير كملته من زمان ومازال ما شريته مرة اخري 

ان شاءالله استفدتو من الموضوع ..

تحياااتي 

Illuminum - Trumpet Flower .. برفيوم تريمبت فلاور من إليومينم

 اليوم حنكلمكم عن احدي افخم دور العطور في العالم .. و هي دار العطور اللندنية اليومينم

تأسست دار العطور في عام 2011 .. و ذاع صيتها اكثر لما استخدمت كيت ميدلتون عطر من عطورهم في بوم زفافها الملكي ..

بس العطر اللي حنكلمكم عليه مختلف .. بس جميل وفخم جدا "هم عندهم مقر خاص بيهم في لندن .. بس انا شريت العطر من هارودز !

 العطر بالنسبة ليا ذكرني واجد بعطر توم فورد البلاك اوركيد ..  في كل شئ .. و خصوصا" في الكلوزنق نوت و في الثبات 

انا ما عنديش خبرة كافية عشان نوصفلكم تدرجات العطر .. بس نقدر نقوللكم انه اول ما نحطه فيه ريحة ورد او ياسمين و برتقال 

و بعد ممكن عشر دقائق تجيك ريحة توابل و فانيلا  بعد ساعاااااات تبدي تشمي في ريحة المسك بس عالخفيييييف 

متوفر الطلب اونلاين علي موقعهم هنا

 بس طبعا" الافضل هو التجربة ثم الشراء .. الا لوعندك فكرة عالعطر و قررتي تشريه اونلاين 

رأي الخاص : عطر مميز جدا" .. انثوي لأبعد حد وحيميزك جدا" لانه نادر في تركيبته و فخامته  ..

تحياااااااااتي 

Black Up Contouring Stick Review ... بلاك آب كونتور ستيك ريفيو

كثير منكم ممكن تكون البراند جديدة عليه .. او لا يملك معلومات عنها لذلك قررت نعطيكم برييييف سريع عنها ..

Black Up  

هي ماركة مكياج فرنسية ذات جودة عاليه جدا" تم تطويرها للبشرات الحنطية و السمراء خصيصا" و البشرة البيضاء   ايضا" ليست استثناء ..

 لكن منتجاتها تغطي تدرجات البشرة السمراء اللي زي ما كلنا نعرفو مظلومة مع اغلب البراندات .. 

في االبداية كان يقتصر وجودها علي 

موقعهم اونلاين و موقع سيفورا  .. و فروع سيفورا المنتشرة في فرنسا .. 

 و اليوم بدأت تأخذ رواج و انتشار كبير جدا" و وصلت مؤخرا" لدول الخليج و شفت كم بلوقر خليجية يحكو عليها ..

تجربتي مع البراند بدأت ممكن من سنة ونصف فاتت بالصدفة .. طبعا" و بتوصية من خبيرة مكياج فرنسية

و كانت بالفعل توصية جميلة جدا" و اشكرها عليها .. 

 اليوم حنحكو عن احد المنتجات و اللي هو الكونتور ستيك الرهيييييييب 

Black Up Contouring Stick 

 اصبع الكونتور من بلاك اب .. زي ما انتو شايفين من الصورة هو اصبع له اتجاهين ..

 اتجاه باللون الغامق للكونتور و اتجاه باللون الفاتح للأضاءة 

فيه منه ست درجات من 00 الي 06 

تركيبته كريمية .. بس خفيييفة و سهلة الدمج جدا" لدرجة انك لو حتي كنتي مبتدئة حتلقي الفينش كأنك طالعة من تحت يد ميكب ارتست محترف .. 

و الفينش النهائية مات بس مش مات ميه في المية .. 

..اممممم مش عارفة كيف نوصفها هههه مات بس هيلثي مات وفيه قلو حلو :) 

سعره : 42 دولار 

اي سؤال تقدرو تعلقو هنا او في الانستاقرام او الفيسبوك 

تحيااااااتي ...

Naked 2 Palette from Urban Decay Cosmotics Review .. نيكيد باليت 2 من آربن ديكاي

 في البداية حنكلكم شويا عن عدد الالوان في الباليت ونوعها و ملمسها و بعدين نقوللكم عن رأي الشخصي و نصيحتي بخصوص البراند وجودة الشدو .. و عن الفرشاة المصاحبة للباليت 

  زي ما انتو شايفين الباليت يحتوي علي 12 لون .. تتراوح بين المضيئة بلمسات من الشيمر(اللمعة)الي المات (مطفية)الناعمة الملمس

الألوان يغلب عليها  الرمادي الداكن و البنيات ذات التون الرمادي و الالوان نيوترال(محايدة)  (( تتمثل في البني المائل للرمادي و  النحاسي الشيمري و 

((الاسود الفاحم

الفرشاة جزء مهم من الباليت .. كواليتي ممتازة وهذا اللي تتميز بيه منتجات الاربن ديكاي بصفة عامة ..عندي تجارب ثانية مع الباليتس متاعهم و في كل مرة الفرشاة تكون ممتازة و عملية و ذات جودة عالية ..

يعني  كنتيجة نهائية للمنتج .. انتي مش خسرانة 

الفرشاة عندها نهايتين نهاية لوضع الشادو و ونهاية  للدمج

رأي الخاص : البراند هاي ايند .. يعني زي العادة و زي ما هو متوقع الكواليتي امتاع الشدوات جيدة جدا" .. ما  قلتش ممتازة لانه يسير شويا فال أوت و انتي تاخذي في الشادو و ضروري من برايمر عشان حدة اللون و ثباته 

الباليت كان حجر اساس ليا و انا مبتدئة .. عشان هكي اي واحد يا دوب تبي تتعلم ننصحها علي طول بنيكد 1و 2 

يعتبرن اساسيات و مهمات جدا" .. 

سعره : 54 دولار 

نتمني يكون الريفيو خفيف عليكم :) 

تحياتي ... 

Black Musk Perfume (The Body shop ).. عطر المسك الأسود من البودي شوب

اختياري من البودي شوب من مجموعة المسك الاسود Black Musk ، شي خراااااافي من البودي شوب !! 

BLACK MUSK (50ml)

Eau de perfume

البودي شوب  معروفين بالزيوت العطرية و بمجموعات المسك المتنوعة المسك الابيض، و السموكي روز و المسك الاحمر 
و اخيرا" هذه المجموعة المسك الاسود ..

العطر حلووو اول ما تحطيه تجيك ريحة سويييت و  منعشة 
بس في  نهايته تطلعلك نوتات المسك و الفانيلا 
ريحة فخمة و انثوية ..

العطر نازل بثلاث اشكال: 

البرفيوم ) ريحته قوية و تركيزه عالي و ثابت لفترات طويلة ) 

ادو تواليت ) خفيف و اقل ثباتا" ) 

الزيت العطري ) نفس البرفيوم بس زيت)

الفكرة في ان الزيت العطري يثبتلك العطر فترات طويلة ..

حاليا" قاعدة نخطط امتي نمشي عشان ناخذ المجموعة كاملة و عشان نديرلكم ريفيو متكامل عن الرانج هذا من منتجاتهم ..


تحياتي 😍😍

M.A.C Haul .. مشترياتي من ماك

Brushes 

 فرش الميكب المرة هذه .. اخترت فرشتين مشهوراااات جدا" من ماك و هما 

1/ MAC 217 

 فرشة الدمج الغنية عن التعريف من ماك 

مش حنكتب رأي الخاص فيها حاليا" لحد ما نجربها و نحكيلكم عنها ان شاءالله 

السعر : 25 دولار ..125 دينار ليبي حاليا" للأسف 

2/ MAC 219 : Pencil Brush 

فرشه رأسها مدبب زي القلم , تستخدم في اللوكات اللي فيهم تركيز عالكريز و لوضع الاضاءة في مدمع العين 

 نفس سعر الفرشه السابقة .. 

ملاحظة: سعر الفرش قد يبدو مبالغ فيها و البعض يعتبرها غالية السعر .. لذلك لو انتي مبتدئة و ميزانيتك محدودة فيه بدائل غيرها .. اكيد مش نفس الجودة بس علي الاقل كبداية لك :) 

Eye Lashes

رموش  أرقامهم  

MAC (C) 46 

MAC (A) 36

السعر للنوع الواحد  : 17 دولار .. 85 دينار ليبي 

Eye Brow Mascara

ماسكرا للحواجب 

1/ Quiet Brunette

 جميييييله جدا" نتعب و انا نقول ممتازة مجربتها من قبل و ما نقدرش نقعد من غيرها

غريبة ما حكيتلكمش عليها من قبل !! ان شاءالله قريب حنحكيلكم عليها بالتفصيل 

2/Beguile 

ماسكرا حواجب نوع مش مجربته من قبل بس سمعت عليه مدح .. حنجربه و نقوللكم النتيجة

 السعر للواحدة : 17 دولار .. 85 دينار ليبي 

In Extreme Dimension 3D

 Black Lash Mascara 

 ماسكرا للرموش 

Water proof , Long wear 

السعر : 23 دولار ..115 دينار ليبي 

Lip Liner 

1/ Nightingale Lip Liner 

2/Whirl Lip Liner 

 سعر اقلام تحديد الشفاه للقلم الواحد  : 17  دولار .. 85 دينار ليبي 

Cleanse Off Oil 

 مزيل للمكياج  ذو اساس زيتي .. اول تجربة و حنتكلم عليه بعد التجربة .. بس مبدئيا" متفائلة بيه لانه 

اي مزيل ميكب اساسه زيتي يكون ممتاز و اكيد ماك مش حتكون استثناء 

السعر :32 دولار .. 160 دينار ليبي 

  

MAC fix Plus 

 غني عن التعريف الفكس بلس .. و تجربتي معاه ممتازة و تمتد لسنوات من الاستخدام 

نستخدم فيه قبل المكياج في عملية الترطيب .. و بعد المكياج .. لا استغني عنه ابدا" .. جميييل 

وله استخدامات ثانية حنحكيلكم عنه بالتفصيل في ريفيو منفصل .. ان شاء الله 

 السعر : 23 دولار .. 85 دينار ليبي 

تحيااااااتي ..

My Mini The Balm Haul .. هال مصغر من ذا بام

ذا بام من البراندات المعروفة بجودتها و سعرها المقبول جدا" .. بس ولا مرة جربت منهم اي منتج

بس المرة هذه و بعد ما سمعت مدح كبييير جدا" عن باليت 

Meet Matt(e) Trimony 

 قلت ضروري نجرب و خصوصا" انه الباليت كله مات ايشادوز .. و الجميع من ميكب ارتست و بلوقرز اجمعو علي جودة  الشادوز المات  (المطفية) من ذا بام وهذا زاد شجعني  

و بالمرة شفت لون خريفي بأمتياز من اصدارهم ايضا" المطفي للأرواج السائلة  اسمه 

Dedicated 

Meet Matt(e) Trimony 

من الاسم هو الاصدار الثالث من مجموعة (مات) كالعادة كل شي كيوت و متناغم و جميل 

الباليت فيه تسع الوان .. جميعهم مطفيات كلهم نيوترال .. 

الملمس فيلفيت و ناعم قريب من انه يكون كريمي عن انه يكون باودر .. 

سعره تقريبا .. 185 دينار ليبي 

Meet Matt(e) Hughes in Dedicated

Long lasting Lipstick 

 الروج فيه منه 12 لون .. بس انا المود عندي كان خريفي عشان هكي اخترت

ديديكيتيد .. 

الاندرتون امتاعه يعطي علي بلو .. و كان جمييييل اللون 

اول شي لاحظته انه هو ريحته نعناع علي فانيلا 

ثاني شي انه ناعم جدا و انتي تحطي فيه .. سمووووث 

يجف بسرعة و يتحول الي مطفي في وقت قياسي 

.. عيبه الوحيد لازم من الترطيب الجيد 

و تقشير الشفايف قبل و بعد الاستخدام .. 

سعره .. 85 دينار ليبي

تحياااااتي .. 

Ita Kabuki Brush Plus The Orginal Contour Kit by ABH Review .. فرشاة ايتا كابوكي من نارس + باليت كونتور البودر من انستازيا

 اليوم قررت نحكيلكن عن موضوعين منفصلات و مرتبطات في نفس الوقت !! كييييف؟

لان الموضوع عن براندين مختلفات و منتجين مختلفات بس اللي ربط بينهم هو انهم مكملين لبعض و من ضمن مفضلاتي في   الاستخدام مع بعض  ..

Ita Kabuki Brush

الفرشاة هذه شهرتها و سمعتها تسبقها كفرشاة مخصصة للكنتور .. 

و نارس ابدعت في تصميمها Nars

من حجمها المناسب و العملي و خفتها و شكلها الانيق .. الي دقة شعيراتها المصنوعة من شعر الماعز المعالج .. 

..و علي عكس فرش الكنتور الثانية ما فيش خشونة و لا قسوة في الشعيرات 

انتي مجرد تحطي المنتج عالبرش و تحركي للامام و الخلف و هي تقوم بالعمل علي اكمل وجه  :)

كونتور الخدود .. كونتور الانف 

ممكن ايضا" تستخدميها لوضع الهايلايت علي عظمة الخد بكل دقة ..

الفرشاة فيه من يعتبرها غالية السعر بس من وجهة نظري تستاهل سعرها و هي صفقة ناجحة 

Very Good Work By Nars .. and i may say (you can not achieve good makeup with out good tools ) 

The Orginal Contour Kit by ABH 

اعتقد الجميع اصبح يعرف منتجات انستازيا بيفرلي هيلز.. من منتجات الحواجب التي عرفت بيهم الي اشهر منتجات الكونتور الي الايشادوز ذات الجودة العالية ..

 الكونتور باليت هذا معروف عالميا" بجودته و العديد من خبراء التجميل يعتمدو عليه في تكملة اي اطلالة 

كانت فيه مشكلة وهي انه كان ما يناسبش الدرجات السمراء و الحنطية ..

 بس البراند نزلو باليتين ثانيات كتمكلة للمنتج .. و الحقوه بالكونتور الكريمي الذي لم يلاقي نفس النجاح للاسف ..

المهممممم خلونا في الباليت اللي حنحكي عليه ..

Light to Medium..Powder Contour

 الدرجات اللي في السطره العلوية هما درجات الهايلايت 

Vanila :  فانيلا هذه اضاة مات (مطفية) ملمسها زي الكريم بس مش كريم صريح

Banana :  بنانا اضاءة بلون اصفر  للتنوير تحت العين و بالتأكيد مطفية 

Sand : ساند أضاءة بشيمر (لمعة )  لعظمة الخد او عظمة الحاجب فوق الشفايف 

 السطره السفلية درجتين كونتور و درجة برونزر كلها درجات مطفيه 

Java : جافا  لون دافئ و معتدل بلون بني  

Fawn :  فاون لون بني  بس بارد و هو اكثر شي مناسب للكونتور 

Havana :   هافانا لون بني محمر 

الخلاصة ان الباليت ممكن تستخدميه ايضا" كا

آيشادو و اضاءة لعظمة الحاجب بالاضافة للكونتور .. منتج  ممتاز و ممكن لما يكمل تعاودي تشري  او تديري اعادة تعبئة من موقع انستازيا ..

و بسسسس :) 

تحياتي لكم .. 

Wet'n'Wild Floral Values Eye Shadow Palette Review .. ويت آن وايلد فلورال باليت

حنكلمكم اليوم عن  منتج من واحدة من اهم براندز ال

 Drug Store

 والتي تمتاز بأسعارها التنفاسية و جودة منتجاتها مقارنة بسعرها 

 ماركة ويت ان وايلد 

الباليت اللي حنتكلم عنه هو من ضمن خط يحتوي ثلاث باليتات متنوعة الالوان بين المات و الشيمر

الباليت الواحد فيه خمس الوان .. تقدري تستوحي منها اي لوك انتني تحبيه .. و حتلاحظي انه الايشادوز مكتوب عليهن وين ممكن تستخدمي كل لون لو انتي تحبي تطبقي التعليمات 

..تقدري تديري لوك صيفي خفيف و تقدري تديري بنفس الباليت لوك دراماتيك و سموكي 

التعليب 

ممتاز و عملي و ما يحتاج حيز كبير .. ممتاز للسفر و التنقل 

جودة المنتج 

الايشادو بالنسبة للسعر يعتبر جيد , بس لو قررنا نتكلمو عن جودة الشادو فهي لا تقارن بجودة شادوات ماك او ميكب قيك او نيكد علي سبيل المثال 

لانها تتناثر .. و ضروري جدا" يكون قبلها تم تحضير العين ببرايمر للايشادو عشان تكون الالوان واضحة و قويه 

مميزات 

 مناسبة جدا" للمبتدئين و للأشخاص الذين يبحثون عن منتجات  تؤدي الغرض و بسعر منخفض

العيوب

الفرش المرافقه له لا تصلح للاستخدام بصراحة .. 

و تناثر الايشادو و تكرار الطبقات للحصول علي حدة اللون المطلوبة 

تحياتي ...

Bourjois Healthy Mix Concealer Review كونسيلر هيلثي مكس من بورجوا

Healthy Mix Concealer

ريفيو سريع عن الكونسيلر العملي و الفظييييع من بورجوا .. و سعره جدا" جميل 

 التغليف 

  ممتاز و عملي .. ما فيش مجال انه تطلع كمية اكبر من اللي انتي تبيها من المنتج 

التركيبة 

   كريمية .. ثقيلة نوعا" ما للوهله الاولي .. بس سهل التوزيع و سريع الدمج و يتحول من كريم الي باودر .. و لما يوضع بطريقة صحيحة مش حيخطط معاك 

هو خالي من الزيوت و مناسب جدا" للبشرات الدهنية .. بس انا بشرتي جافة و مشي معاي ممتاز لاني نرطب في منطقة العين كويس جدا" ..

علي حسب ما تسوق الشركة انه هو علاجي و في نفس الوقت تجميلي لانه يحتوي علي خلاصة الخوخ و الرازبيري و البطيخ 

للتفتيح و الترطيب و تنشيط الدورة الدموية (( ما لاحظتش اي تغيير بصراحة )) بس في نفس الوقت ما فيش اي تأثير سلبي علي منطقة العين ..

العيوب 

الرائحة غريبة شويا .. مش سيئة بس رائحة غريبة   

محدودية الدرجات .. فيه منه ثلاث درجات و فواتح هن الثلاثة .. 

رأي الشخصي : يستحق الاقتناء و الاستخدام و ليس فقط ككونسيلر و لكن حتي للاضاءة مع الكونتور

تحياتي ..

The Body Shop Strawberry Body Care Set ... مجموعة الفراولة للعناية بالجسم من البودي شوب

حنكلمكم اليوم عن احدي اشهر المجموعات من البودي شوب .. مفروض حكيت عليها من فترة وهي مجموعة 

العناية بالجسم المستخلصة من الفراولة 

اهم ما يميز المجموعة هي العطر الجميييييل و الفواح .. اللي حيخليك تلقائيا" تخشي في مود الاسترخاء 

و الانتعاش 

1/  STRAWBERRY SHOWER GEL

الشاور جل خالي تماما" من الصابون , يحتوي علي خلاصة زيت بذور الفراولة

يمتاز برغوة غنية .. و بالتأكيد ما يخليش اي جفاف بعد الاستعمال 

اللي يعني من جلد حساس .. استخدامه جدا" امن .. 

2/   STRAWBERRY    SOAP

 قالب صابون  للجسم مصنوع من عصير الفراولة  و خلاصة زيت جوز الهند و الجيلسرين

 ينظف و يحسن ملمس الجلد 

 و الرائحة جدا" مميزة و مريحة للاعصاب 

3/   STRAWBERRY  BODY  POLISH 

 .. ينظف و يقشر البشرة برغوة وفيرة

 التقشير مسوؤل عنه مسحوق من لوز عين الجمل وبذور الكيوي مدعم برائحة الفراولة

و عصير الفراولة الغني بفيتامين  C

و زيت عباد الشمس و زيت اللوز 

مناسب للبشرات العادية .. اصحاب البشرات الحساسه ممكن مش حيكون مناسب ليهم ..

4/    STRAWBERRY   BODY     BUTTER

كريم غني جدا" .. خاص بترطيب جلد الجسم و المناطق الخشنة

يتغلغل علي طول في طبقات الجلد و يجف تاركا" وراءه بشرة ناعمة الملمس .. 

مكونه الرئيسي هي زبدة الشيا و مدعم برائحة الفراولة ..

تحياتي .. 

Clarins Empties Review .. تجربتي مع بعض منتجات كلارنس

CLARINS EMPTIES REVIEW

كلارنس هي أحد احب البراندات علي قلبي .. و عندي ثقة عمياء في منتجاتهم و أجيال من المستخدمات العاديات و حتي البرو ميكب  ارتست يفضلوها للعناية ببشرتهم، اهم ما يميز كلارنس هو انها ماركة طبية 

و ما فيش منها اي خوف ولا تسبب اي ضرر للبشرة  

مش حنقدر نلخص كل تجربتي مع منتجاتها في ريفيو واحد بس قررت نبدأ معاكم بمنتجات استخدمتها و نفذت مني و عاودت شريتها مرات ثانية .. بصراحة ما نخليش شئ لا منتج كامل ولا علب التستر كل شئ من كلارنس مااااشي  :)  ولازم يستخدم  

1/ Multi active skin renewal serum

 المنتج هو عبارة عن سيروم يستخدم للبشرات الشابة التي تسعي لمقاومة ظهور التجاعيد او للحد من الخطوط التعبيرية البسيطة 

مناسب لجميع انواع البشرة 

قوامه : كريمي

طريقة عمله بأختصار : هي عن طريق تحفيز الكولاجين الموجود في طبقات الجلد عشان يقاوم ظهور التجاعيد

اجمل شئ فيه هو انك تقدري تستخدميه في النهار او في الليل و تكملي روتينك عادي جدا" , طبعا" استخدمته لفترة سنتين او اكثر بعدها تحولت لمنتج اخر من كلارنس حكيتلكم عليه في المدونة هنا

رأي الخاص : منتج جميل . نتائجه رووووعه , ريحته حلوة 

تحفظي الوحيد هو انه الكمية شويا  :( 

2/Super Restorative Day Cream 

 المنتج هذا جاني هدية مع مجموعات مشتريات من موقع نوردستروم الأمريكي و بلا شك جربته  هههه

 كنت نستخدم فيه ككريم نهاري  مع تكرر الاستخدام حسيت بأشراقة في الوجه و قلو صحي و بشرتي كانت مشدودة طول فترة الاستخدام 

يعني خلال اسبوعين شفت نتائج مرضية جدا" 

مصممه لجميع انواع البشرة .. ما تدهنش ولا تطلع حبوب حتي في الاماكن

 اللي ممكن تطلع فيهن حبوب زي ال

 T -Zone

3/Extra-Firming Night Rejuvenating Cream 

 للأسف الكريم هذا سمعت عليه مدح وااااجد و تمنيت نجربه لفترة اطول :(  و فاز بأفضل كريم ليلي بس مش للبشرات الشابة عشان هكي ما شريتاش و اكتفيت بالسامبلز اللي مش متذكرة منين جوني بصراحة 

و علي حسب تجربتي مع كلارنس انا واثقه انه النتائج حتكون  جيدة جدا" لو حد عنده تجاعيد .. يعني للاعمار من بعد الثلاثين 

ياريت لو حد فيكم عنده تجربة معاه يشاركنا عشان الكل يستفيد ..

4/ Gentle Foaming Cleanser with Cottonseed 

 غسول الوجه المصنوع من خلاصة بذور اللوز .. يتحكم في عملية افراز الدهون بطريقة متوازنة بدون اخلال بتوازن البشرة و رطوبتها .. 

مصنوع للبشرة العادية و المختلطة 

قوامه : كريمي 

 رغوته وفيرة زي الصابون بس في نفس الوقت ، شعوره عالبشرة كأنه كريم 

.. بمعني انه ما يديرش احساس بالجفاف للبشرة 

نتمني يكون الموضوع نال اعجابكم و ساعدكم في فهم جزء من منتجات كلارنس 

تحياتي ..