Inglot Review (Part 1)

جميلاتي العزيزات كيف حااالكن :*

اليوم قررت اني نديرلكن Review عن جزء من تجربتي مع ماركة Inglot  ...

 لماذاااا ؟؟! 

لأنها متوفره في ليبيا و عندها فروع في بنغازي و طرابلس و في متناول أيديكن :")

حنحاول قدر الإمكان اني اي حاجة جربتها و متوفرة في ليبيا حنعطيها الأولويه في الReviews

طبعا" Inglot

 من البراندز  اللي نحبهن و نشجعكن علي تجربتها و اي شي

 من عندهم حيكون سعره فيه .. حنبدا بالشئ المفضل عندي و عند ملايين البلوقرز حول العالم و هو 

 gel eyeliner

 رقمه حلو و ينحفظ بسهووووله  ( رقمه 77) ، الايلاينر هذا يجنن ، يخبببببل ، يهببببل و ما فيش زي السواد امتاعه و لا الثبات امتاعه ، حتي لو دمعتي مش حيرخي بيك الحبل في نص الطريق ههههه هو مقاوم للماء water proof ، و لذلك ممكن يكون متعب في  إزالته  لما تجي تنظفي عيونك بعد الميكب .. و هذا نقدرو نقولو العيب الوحيد ، لذلك تبيلك مزيل مكياج عيون كويس جدا" عشان تنظفي عيونك كويس .. 

.. inglot gel eyeliner بطل بطل و يستحق انه يكون من ممتلكاتك :) 

الشي الثاني و المهم هو كم فرشة ميكب جربتهن من عندهم حنكتبهن بالرقم و شنو رأي فيهن ..

1/ inglot 6ss 

هذه فرشاة دمج لﻵيشادو و نحبها وااااجد لانها عمليه و شفت بلوقرز واجدات يشبهنها بفرشاة

 MAC الشهيره رقم 217 

و بما اني مازلت ما حصلتها قلت خلي نجرب فرشة inglot 

و استخدمتها لكونتور الأنف البودر 

و استخدمتها للهايلايت برضو 

و لقيت انها ممتازة ، في جميع الحالات 

هي فرشاه مصنوعه من الشعر الطبيعي المعالج لذلك تمسك الايشادو و الكونتور باودر وما لاحظتش اي تناثر و انا نستخدم فيها .. 

و تنظيفها و تعقيمها سهل و بسيط ..

2/Inglot  30T 

هذه فرشاة ايلاينر رأسها مدبب زي سن القلم و فيها إعوجاج من قدام عشان تسهل عملية الرسم ..

هي فرشاة كويسه .. بس انا ما حبيتهش :( 

 نحس فيها شويا صلبه و عادة ما نحكمش علي شي من اول مره ، 

جربتها اكثر من مره بس ما لناش نصيب مع بعضنا ههههههه .. بس لو انتي تحبي الرسم بايلاينير سائل فهي راسها نفس الشي و ممكن تمشي معاك .. و اللي مجربتها خلي تقوللنا علي تجربتها معاها ؛) 

3/Inglot 31T 

الفرشاه هذه هي حبيبة القلب ♡♡:) 

هي رأسها مشطوف و مائل عشان هكي اسمها الفرشاه المشطوفة 

الشعر امتاعها صناعي ، عشان هكي نحب نستخدمها مع الجل لاينر اللي حكيتلكن عليه من انقلوت .. 

نحب نرسم بيها الايلاينر لان راسها مرن و تعطيك رسمه دقيقه .. بصراحه ابدااااع و بطوله الفرشه هذه 

و ننصحكن تواااا تواااا تمشن تشرنها :D

4/Inglot 16BJF 

هما الفرشاه هذه يصنفو فيها من مجموعة فرش الوجه

 Face Brushes

لما شريتها كنت ناوية نستخدمها في توزيع الفاونديشن قبل ما نستخدم البيوتي بليندر 

بس (ممكن انا حساسه اكثر من اللازم هههههه) حسيتها صلبه عالبشره و تعطيك احساس بالوخز 

و هي جديده طبعا

بس بعد اول غسله حسيتها ارتخت شويا و قعدت نستخدم فيها للبرونزر و توزيعه ولا لل

 Lose powder تحت العين 

هي مصنوعة من شعر الماعز .. يعني شعر طبيعي معالج و مصبوغ .. في الغسل كانت ممتازة ما فيهش اي ريحه غريبة بس مهم تخليها تجف كويس  

في الصورة فيه السبونج امتاع

 Inglot اسمها بالتحديد  Pro blending  Sponge 

و نوعين كونسيلر جربتهم 

و

illuminator

حنحكي عليهن في البوست القادم بعد ما نشوف تفاعلكن .. 

سلااااام توا يا حلواااات