انواع الآيلاينير ،مميزات و عيوب ، و تجربتي !! Types Of eyeliner , pros and cons, plus my experience !!

1/ Pencil liner قلم الكحل 

طبعاً النوع هذا من الآيلاينير مشهور جداً  و متأكدة ان عند أغلب البنات و المدامات و أغلب خبراء التجميل يقولو انك لو يدك ترجف و مازلتي تتعلمي كيف ترسمي عينك ، الأفضل انك تبدي بالقلم الجاف 

المميزات:

•سهل الاستخدام

•لو غلطتي تقدري تمسحي و تصلحي 

•يستخدم لملء لخط العين السفلي

•يستخدم لتضييق خط العين العلوي 

•يستخدم كطبقة قبل الايلينر السائل للي بشرتها دهنية و الآيلاينير امتاعها يتحرك من مكانه

العيوب :

•يمتسح بسرعه و يبهت بسرعه

•يطبع علي الجفن

•يبي براية ديما عشان تقعد سنه مدببه

•لازم تجربي اكثر من نوع عشان تلقي اللي يناسبك 

تجربتي: 

جربت بورجوا waterproof و Gosh

اللي متوفرات في ليبيا ، اللي مش متوفر هنا مش حنكتبه الا لو تحبن تعرفن 😍 

ممتازات هن الاثنين ، بس انا مش معتمدة عليهن في رسم العين ، نستخدم فيهن تحت خط الرموش السفلي و العلوي و عالأغلب نثبت فيهن بالآيشادو الاسود ..

2/Liquid liner الكحل السائل 

أشهر انواع الآيلاينير ، مشهور بسواده و بأنه يستخدم 

في رسمة ال

 Cat eye  

مميزاته:

•ثابت لفترة طويله

•ما يطبعش عالجفن 

•سواده حلو 

عيوبه:

•يبي يد ثابته في الرسم

•لو لخبطتي و مسحتي يلبز الدنيا

•اللي مازالت تتعلم رسم العين و تبيه هو لازم تدربي عليه في الحوش قبل و ما يكونش عندك طلعه عشان تلبزي برااااحتك😂 

تجربتي : 

الحقيقة اني انا بديت بيه ، و ياااامااااا غلطت و درت wings غريبات و غليظات و اييييييه لحد توا نحب و انا نرسم بيه نقعد مركزة كلياً في الرسم هههههه و احتمال لو حد تحرك جنبي نقتله 😱😋😋

بديت بآيلاينر ديبورا خذيته من محل سندس في السلماني ((الله الله ذكريات )) 😢😭

و توا تنوعن الاستخدمات و جربت انواع وااااجدة و أغلبهن مش متوفر في ليبيا بس في واحد مميز عندي و هو ايلآينر البودي شوب the body shop 

يهبل و الريشة امتاعه(Applicator ) راسها يابس شويا و تساعدك في الثبات و انتي ترسمي و سواده يهبل .. بطللللل رسمي 😍

3/Gel or Cream Liner  الجل لاينر

من اول ما تعلمت استخدامه معش غيرت من عليه لانه يجمع مميزات القلم العادي و السائل 

لو انتي مبتدئة زي ما كنت انا زمان و خاطرك فيه ما تخافيش ما فيش حاجة ما تجيش بالتدريب و المحاولة 😘

مميزات:

•سواده فاحم و في نفس الوقت هادي 

•ما يحتاجش انك تسنيه عشان يجف زي السائل

•تقدري تدمجيه فوق العين و تديري بيه سمكوي لوك ، و تقدري تخليه ايلآينر عادي و تقدري تديري بيه سموكي مدموج تحت العين 

•ثابت و ما يبيهتش 

عيوبه:

•ممكن يجف لو ما اعتنيتيش بالعلبه و سكرتيها كويس

•يحتاج فرشاه للرسم 

تجربتي :

نستخدم في نوعين نوع نقدر نستخدمه مع السموكي و ندمجه و هو

 MAC Black Track

و الثاني هو

 Inglot gel liner 

و هذا نستخدم فيه لما نبي ندير لوك معتمد بس عالآيلينر زي الكات آي

 cat eye

وهن الاثنين ننصح بيهن بقوووووة مع ان كحل ماك مش متوفر في ليبيا بس كان ضروري اني نذكره 

4/Eye Shadow ظل العيون 

طبعاً هذا مش ايلآينر بمعني الكلمة بس تقدر تستخدمي ظل العين اللي باللون الأسود كأيلاينر 

في حالات معينة لما تكوني طالعه مستعجلة و ما عندكش وقت للخطأ و المسح و التعديل  و طبعاً يحتاج انك تستخدمي نفس الفرشاة اللي تستخدم في رسم الجل لاينر

منظره طبيعي يبان و الخط مش داكن .. 

نستخدم في البلاك كاربون من ماك MAC  Black Carbon

و البلاك اوت من نيكد 2 Blackout from naked 2 palette

وبسسسسس خلاص ..

ان شاءالله كان الموضوع سهل و بسيط عليكن